கோவில் பரம்பரை அறங்காவலர் மீது பொய் வழக்கு:ஆர்.எஸ்.மங்கலம் காவல்நிலையத்தில் அராஜகம்-போலீஸ் சூப்பிரண்டு அலுவலகத்தில் பரபரப்பு புகார்!!!

இராமநாதபுரம் மாவட்டம், ஆர்.எஸ்.மங்கலம் தாலுகா,அனுச்சகுடி கிராமத்தில் அமைந்துள்ள அருள்மிகு ஸ்ரீ காளியம்மன் கோவில் பரம்பரை அறங்காவலர் பாஸ்கரன், தனது உயிருக்கும் உடைமைக்கும் பாதுகாப்பு கோரியும், காவல்துறை மீது அராஜக புகாரும் அளித்துள்ளார்.இவர் இந்து மக்கள் நல இயக்க நிறுவனத் தலைவர் இளையராஜாவுடன் இணைந்துபோலீஸ் சூப்பிரண்டு அலுவலகத்தில் நேற்று று ஒரு புகார் மனுவை அளித்தார்.

அந்த மனுவில் பாஸ்கரன் கூறியிருப்பதாவது:-

​அனுச்சகுடி ஸ்ரீ காளியம்மன் கோவிலை தங்கள் முன்னோர்கள் பரம்பரை பரம்பரையாக நிர்வகித்து வருவதாகவும்,பரம்பரை அறங்காவலர் நிர்வாகம் தொடர்பாக சிவகங்கை இந்து சமய அறநிலையத்துறை இணை ஆணையர் நீதிமன்றத்தில் வழக்கு நிலுவையில் உள்ளதாகவும் தெரிவித்துள்ளார்.
​மேலும்,தனது பூர்வீக உரிமைக்காக சென்னை உயர்நீதிமன்ற மதுரை கிளையில் தொடர்ந்த வழக்கில்,கடந்த 21.08.2024 அன்று தங்களுக்கு சாதகமான தீர்ப்பு கிடைத்தது என்றும் குறிப்பிட்டுள்ளார்.
​
​இதன் பின்னரே,ஆர்.எஸ்.மங்கலம் காவல் நிலையத்திலிருந்து,அனுச்சகுடி கிராமத்தைச் சேர்ந்த கதிரேசன் என்பவர் கொடுத்த புகாரை விசாரிக்க வருமாறு அழைப்பு வந்ததாக பாஸ்கரன் தெரிவித்துள்ளார்.உடல்நிலை சரியில்லாத காரணத்தால் ஆஜராகாத தன்னை,இரண்டு நாட்களுக்கு முன்பு காட்டுப்பரமக்குடியில் உள்ள தன் குடியிருப்புக்கே வந்த ஆர்.எஸ்.மங்கலம் போலீசார்,எஃப்.ஐ.ஆர் பதிவு செய்யப்பட்டு விட்டதாகக் கூறி,தகாத வார்த்தைகளால் பேசி மிரட்டி,காவல்நிலையம் அழைத்துச் சென்றதாக குற்றம் சாட்டியுள்ளார்.
​காவல்நிலையம் செல்லும் வழியிலேயே மிரட்டியும்,அடித்தும்,ஒரு திருட்டுக் குற்றத்தையும் ஒப்புக்கொள்ள வேண்டும் என்று வற்புறுத்தியதாகவும், உடல்நிலை சரியில்லாததால் மருத்துவமனைக்கு அழைத்துச் செல்லக் கோரியதையும் காவலர்கள் நிராகரித்துவிட்டதாகவும் மனுவில் அதிர்ச்சி தகவலைப் பதிவிட்டுள்ளார்.

​காவல்நிலையத்தில் சார்பு ஆய்வாளர் தன்னைத் தாக்கி,குற்றத்தை ஒப்புக்கொள்ள வேண்டும் என்று மிரட்டியதாகவும்,வேறு வழியின்றி உறவினர்களுடன் சேர்ந்து குற்றத்தை ஒப்புக்கொண்டு,அவர்கள் கேட்ட இடத்தில் கையெழுத்துப் போட்டு, காவல்நிலைய ஜாமீனில் வீடு திரும்பியதாகவும் பாஸ்கரன் குறிப்பிட்டுள்ளார்.
​”நான் சிவகங்கை அறநிலையத்துறை இணை ஆணையர் நீதிமன்றத்தில் எந்த உத்தரவும் பெற்றுவிடக்கூடாது என்பதற்காக கதிரேசன் என்பவரும்,அவருக்கு உறுதுணையாக ஆர்.எஸ்.மங்கலம் சார்பு ஆய்வாளரும் செயல்பட்டு வருகின்றனர்” என்று பகிரங்கமாகக் குற்றம் சாட்டியுள்ளார்.​பாஸ்கரன் தன் மனுவின் முடிவில், எதிர்வரும் விசாரணையை திருவாடானை உட்கோட்ட துணை போலீஸ் சூப்பிரண்டு அலுவலகத்திலோ அல்லது இராமநாதபுரம் போலீஸ் சூப்பிரண்டு அலுவலகத்திலோ நடத்தி,தான் நிரபராதி என்பதை நிரூபிக்க வாய்ப்பு வழங்க வேண்டும் என்று கோரிக்கை விடுத்துள்ளார்.
​மேலும், “எனது உயிருக்கோ, உடமைக்கோ ஏதேனும் பாதகம் ஏற்பட்டால் அதற்கு கதிரேசனும், ஆர்.எஸ்.மங்கலம் காவல்நிலைய சார்பு ஆய்வாளரும் தான் பொறுப்பு.நடவடிக்கை எடுக்கவில்லையென்றால் நாங்கள் குடும்பத்தோடு தற்கொலை செய்து கொள்வதைத் தவிர வேறு வழியில்லை” என்று உருக்கமான எச்சரிக்கையையும் விடுத்து,தனக்கான நீதியை வழங்கக் கோரியுள்ளார்.