இராமநாதபுரத்தில் தமிழ்நாடு மாநில சிறுபான்மையினர் சிறப்புக் குழு ஆய்வுக் கூட்டம்-மாவட்ட ஆட்சியர் சிம்ரன்ஜீத் சிங் காலோன் தலைமையில் நடைபெற்றது!!!

இராமநாதபுரம் மாவட்ட ஆட்சியர் அலுவலக கூட்டரங்கில் மாவட்ட பிற்படுத்தப்பட்டோர் மற்றும் சிறுபான்மையினர் நலத்துறை சார்பில் தமிழ்நாடு மாநில சிறுபான்மையினர் சிறப்புக் குழு ஆய்வுக் கூட்டம் நடைபெற்றது.

இக்கூட்டத்திற்கு மாவட்ட ஆட்சித்தலைவர் சிம்ரன்ஜீத் சிங் காலோன் தலைமை வகித்தார். மருத்துவர்.அ.சுபேர்கான் (உறுப்பினர்,தமிழ்நாடு வக்ஃப் வாரியம்) முன்னிலை வகித்தார். தமிழ்நாடு மாநில சிறுபான்மையினர் சிறப்புக் குழு உறுப்பினர் மற்றும் திருச்சி கிழக்கு சட்டமன்ற உறுப்பினருமான முனைவர்.த.இனிகோ இருதயராஜ் சிறுபான்மையினர் நலன் திட்டங்கள் குறித்து அனைத்து அரசுத் துறை அலுவலர்களுடன் ஆய்வு மேற்கொண்டு பேசுகையில்:-

தமிழ்நாடு முதலமைச்சர் சிறுபான்மையின மக்களுக்காக பல்வேறு திட்டங்களை வகுத்து ஒவ்வொரு திட்டமும் சிறுபான்மை மக்களை முன்னேற்றிடும் விதமாக வடிவமைத்து அதனை செயல்படுத்தி வருகின்றார்.அவ்வாறு தமிழ்நாடு முதலமைச்சரால் செயல்படுத்தப்படும் திட்டங்கள் அனைத்தும் அடித்தட்டு மக்களை சென்றடைவதை உறுதி செய்திடும் வகையில் தமிழ்நாடு மாநில சிறுபான்மையினர் நலக்குழு அமைக்கப்பட்டதன் அடிப்படையில் இன்றைய தினம் இராமநாதபுரம் மாவட்டத்தில் இந்த ஆய்வுக் கூட்டம் நடைபெறுகின்றது.

தமிழகத்தில் பல்வேறு மாவட்டங்களில் இருந்து பல்வேறு கோரிக்கை மனுக்கள் வரப்பெற்றுள்ளது.இந்த கோரிக்கை மனுக்களில் குறிப்பாக கல்லறைத் தோட்டங்கள் அமைப்பது தொடர்பாகவும்,கபஸ்தானம் மற்றும் தேவாலயங்கள் புதிதாக அமைப்பது,புனரமைப்பது தொடர்பாக தடையில்லா சான்று வேண்டுதல் போன்ற கோரிக்கைகள் வரப்பெற்றுள்ளன.அவ்வாறு வரப்பெற்ற கோரிக்கை மனுக்களுக்கு முக்கியத்துவம் அளித்து மனுக்கள் மீது உரிய நடவடிக்கை எடுக்கப்பட்டு வருகின்றது.

அதனடிப்படையில் இராமநாதபுரத்தில் தமிழ்நாடு முதலமைச்சர் கல்லறைத் தோட்டம் அமைப்பதற்கு 2 ஏக்கர் நிலத்தை ஒதுக்கியுள்ளார்.இதற்கு தமிழ்நாடு முதலமைச்சருக்கு நன்றிகளை தெரிவித்துக் கொள்கிறோம்.மேலும் வேறு எந்ததெந்த பகுதிகளில் கல்லறைத் தோட்டங்கள் மற்றும் கபஸ்தானம் தேவைப்படுகிதோ அதற்கான கோரிக்கை மனுக்கள் பெறப்பட்டு உரிய நடவடிக்கைகள் மேற்கொள்ளப்பட்டு வருகின்றது.

தமிழ்நாடு முதலமைச்சரின் உத்தரவின்படி அமைக்கப்பட்டுள்ள இக்குழுவானது மாவட்டங்களில் கல்லறைத் தோட்டங்கள் தேவைப்படும் இடங்களை அரசுத்துறை அலுவலர்களுடன் ஒருங்கிணைந்து தேர்வு செய்து அந்த இடத்தில் தேவைப்படும் அடிப்படை வசதிகளான மின்வசதி,தண்ணீர்வசதி,சாலைவசதி, சுற்றுச்சுழல் போன்றவற்றுடன் பல்வேறு மாவட்டங்களில் பணிகள் நடைபெற்று வருகிறது.இன்றைய தினம் தங்களிடமிருந்து பெறப்பட்ட கோரிக்கை மனுக்கள் மீது தனிக்கவனம் செலுத்தி அந்த மனுக்கள் தமிழ்நாடு முதலமைச்சரின் கவனத்திற்கு உரிய மேல் நடவடிக்கைக்காக கொண்டு செல்லப்படும் என தெரிவித்தார்.முன்னதாக இக்கூட்டத்தில் கல்லறைத் தோட்டம் அமைத்தல்,தேவாலயங்களை புதுப்பித்தல்,தடையில்லா சான்று பெறுவது தொடர்பாகவும் கோரிக்கை மனுக்கள் வழங்கப்பட்டன.

இக்கூட்டத்தில் மாவட்ட வருவாய் அலுவலர் (பொ) புகாரி,மாவட்ட பிற்படுத்தப்பட்டோர் மற்றும் சிறுபான்மையின அலுவலர் ராஜா மற்றும் அரசு அலுவலர்கள் சிறுபான்மையின முக்கிய நிர்வாகிகள் கலந்து கொண்டனர்.