ரயில்வே திட்டங்களை நிறைவேற்றும் போது அதிகாரிகள் தங்களை பயணிகளாக மாற்றிக் கொள்ள வேண்டும்:தெற்கு ரயில்வே கூடுதல் பொது மேலாளர் அறிவுறுத்தல்!!!

மதுரை ரயில்வே துறை மக்களின் சேவைக்காக ஏற்படுத்தப்பட்டது. எனவே ரயில்வே கட்டமைப்பு திட்டங்களை நிறைவேற்றும் போது அதிகாரிகள் பயணிகளாக மாறி அதற்கேற்ப திட்டங்களை வடிவமைக்க வேண்டும் என வலியுறுத்தினார். தெற்கு ரயில்வே கூடுதல் பொது மேலாளர் விபின் குமார் ரயில்வே கட்டமைப்பு திட்டங்கள் குறித்து அதிகாரிகளுடன் சனிக்கிழமை அன்று மதுரை கோட்ட அலுவலகத்தில் ஆலோசனை நடத்தினார். அப்போது அவர் அதிகாரிகளை பயணிகள் பார்வை கொண்டு கட்டமைப்பு திட்டங்களை வடிவமைக்க வேண்டும் என அறிவுறுத்தினார். ரயில் மதாத் செயலி மூலம் புகார்கள் மற்றும் ஆலோசனைகளுக்கு உரிய முக்கியத்துவம் அளிக்க வேண்டும் எனவும் வலியுறுத்தினார். மேலும் மேலும் பயணிகள் நலத்திட்டங்களை நிறைவேற்ற பயணிகள் மற்றும் சரக்கு வருமானத்தை அதிகரிக்க முயற்சிக்க வேண்டும் எனவும் அறிவுறுத்தினார். கடந்த ஏழு மாதங்களில் மதுரைக்கோட்டம் 144 தினசரி சேவை ரயில்கள் மற்றும் 122 கால முறை சேவை ரயில்களையும் இயக்கி 29 மில்லியன் பயணிகளை கையாண்டுள்ளது. அதேபோல சரக்கு போக்குவரத்தும் 10.11 சதவீத வளர்ச்சி கண்டுள்ளது. இந்த ஆண்டுக்கான இலக்கான 116 கி.மீ. ரயில் பாதை பலப்படுத்துதல் பணியில் 73 கி.மீ. தூர ரயில் பாதைகள் பலப்படுத்தப்பட்டுள்ளது. 68 கி.மீ. தூர ரயில் பாதை இலக்கில் 48 கி.மீ. தூர ரயில் பாதை புதுப்பிக்கப்பட்டுள்ளது. பாதுகாப்பான ரயில் பயணத்திற்கு நான்கு ரயில் சாலை கடவுப் பாதைகள் சைகை முறை கட்டுப்பாட்டிற்க்கு கொண்டுவரப்பட்டுள்ளது. தெற்கு ரயில்வேயில் முதன்முறையாக திண்டுக்கல் மற்றும் திருநெல்வேலி ரயில் பாதை மின்சார பராமரிப்பு பணிமனை, மதுரை ரயில் பாதை மின்சார பராமரிப்பு கட்டுப்பாட்டு அறை ஆகியவற்றிற்கு ஐஎஸ்ஓ தரச் சான்றிதழ் கிடைத்தது போன்ற தகவல்கள் கூடுதல் பொது மேலாளருக்கு ஆலோசனை கூட்டத்தில் தெரிவிக்கப்பட்டது.
கூடுதல் பொது மேலாளர் மூன்று நாள் பயணமாக மதுரை கோட்டத்திற்கு வந்துள்ளார். அவர் வெள்ளிக்கிழமை அன்று ராமேஸ்வரம் ரயில் நிலைய மறுசீரமைப்பு பணிகள் மற்றும் பாம்பன் ரயில் தூக்கு பாலம் ஆகியவற்றை ஆய்வு செய்தார். அவர் சனிக்கிழமை அன்று மதுரை ரயில் நிலைய மறு சீரமைப்பு பணிகளையும் ஆய்வு செய்தார். ஆய்வின் போது கோட்ட ரயில்வே மேலாளர் ஓம் பிரகாஷ் மீனா கூடுதல் கோட்ட ரயில்வே மேலாளர் எல். என். ராவ், கட்டுமான பிரிவு இணை முதன்மை பொறியாளர் கே. ஜி. ஞானசேகர் ஆகியோர் உடன் இருந்தனர். கூடுதல் பொது மேலாளர் ஞாயிற்றுக்கிழமை அன்று மதுரை – திருநெல்வேலி ரயில் பாதையை ஆய்வு ரயில் கண்ணாடி சுவர் வாயிலாக ஆய்வு நடத்த இருக்கிறார்.