இராமநாதபுரத்தில் மாநில சிறுபான்மையினர் ஆணைய கலந்தாய்வுக் கூட்டம்:ஆணையத் தலைவர் அருட்தந்தை சொ.ஜோ.அருண்,சே.ச தலைமையில் நடைபெற்றது!!! 

இராமநாதபுரம் மாவட்ட ஆட்சியர் அலுவலக கூட்டரங்கில் தமிழ்நாடு மாநில சிறுபான்மையினர் ஆணையம் மூலம் சிறுபான்மையினர் கலந்தாய்வுக் கூட்டம் நடைபெற்றது. 

மாவட்ட ஆட்சித்தலைவர் சிம்ரன்ஜீத் சிங் காலோன்,தமிழ்நாடு மாநில சிறுபான்மையினர் ஆணையத் துணைத்தலைவர் எம்.எம்.அப்துல் குத்தூஸ் என்ற இறையன்பன் குத்தூஸ் மற்றும் தமிழ்நாடு மாநில சிறுபான்மையினர் ஆணைய உறுப்பினர்கள் ஆகியோர் முன்னிலையில்,தமிழ்நாடு மாநில சிறுபான்மையினர் ஆணையத்தலைவர் அருட்தந்தை சொ.ஜோ.அருண்,சே.ச தலைமையில் சிறுபான்மையினர் நலத்துறையின் மூலம் செயல்படுத்தப்பட்டு வரும் திட்டங்கள் குறித்து ஆய்வு செய்ததுடன்,கலந்தாய்வுக் கூட்டத்தில் சிறுபான்மையின் அமைப்பு பிரதிநிதிகள் மற்றும் பொதுமக்களிடம் கோரிக்கைகள் குறித்து கேட்டறிந்து, கோரிக்கைகள் தொடர்பான மனுக்களை பெற்று பேசினார்.

அப்போது அவர் பேசியதாவது:-

மாண்புமிகு தமிழ்நாடு முதலமைச்சர் அவர்கள் மற்றும் மாண்புமிகு தமிழ்நாடு துணை முதலமைச்சர் அவர்கள் அறிவுரைப்படி,சிறுபான்மையினரின் பொருளாதார முன்னேற்றத்திற்கு தேவையான அரசின் திட்டங்கள் சென்றடையும் வகையில் கோரிக்கை மனுக்கள் பெற்று உரிய தீர்வு வழங்கப்பட்டு வருகிறது.

அதனடிப்படையில் மாவட்டந்தோறும் சிறுபான்மையினர் மக்களுக்காக கலந்தாய்வுக் கூட்டம் நடத்தி அவர்களின் கோரிக்கைகள் நிறைவேற்றப்பட்டு வருகிறது. அதன் தொடர்ச்சியாக இன்று இராமநாதபுரம் மாவட்டம் 37-வது மாவட்டமாக கலந்தாய்வு கூட்டம் நடைபெறுகிறது. நிறைவாக சென்னையில் கலந்தாய்வு கூட்டம் நடைபெற உள்ளது.இதுவரை 1477 மனுக்கள் பெறப்பட்டு அதில் 1156 மனுக்களுக்கு தீர்வு வழங்கப்பட்டுள்ளது.சிறுபான்மையினர் மக்களின் முக்கிய கோரிக்கையாக கல்லறை தோட்டம் மற்றும் கபர்ஸ்தான் மிக முக்கிய கோரிக்கையாக இருந்து வருகிறது.தமிழகம் முழுவதும் இக்கோரிக்கை அதிகளவு இருப்பதால் மாண்புமிகு தமிழ்நாடு முதலமைச்சர் அவர்களின் கவனத்திற்கு கொண்டு சென்று எல்லா மாவட்டத்திலும் நகர் பகுதி முதல் கிராம பகுதிகளில் வரை கல்லறை தோட்டம் மற்றும் கபர்ஸ்தான்க்கான இடம் வழங்கிடும் வகையில் நடவடிக்கை மேற்கொண்டு மாண்புமிகு தமிழ்நாடு முதலமைச்சர் அவர்களால் விரைவில் இதற்கான உத்தரவு கிடைக்கப்பெறும்.மேலும் இன்று நடைபெற்ற ஆய்வுக் கூட்டத்தில் மிக முக்கிய கோரிக்கைகளான பள்ளி,கல்லூரி மாணவ,மாணவிகளுக்கு தடையின்றி கல்வி உதவித்தொகை வழங்க வேண்டுதல்,கல்வி கடனுதவி,நடுநிலைப்பள்ளி மற்றும் உயர்நிலைப்பள்ளி தரம் உயர்த்த வேண்டுதல்,புதிதாக மேல்நிலைப்பள்ளி அமைத்தல் மற்றும் பள்ளிகளுக்கு போதியளவு ஆசிரியர்கள் நியமனம் செய்தல்,வீட்டுமனை பட்டா வேண்டுதல்,பெளத்தர்கள் இருக்கும் இடங்களில் உள்ள சிலைகள் வழிபட தேவையான இட வசதி வேண்டுதல் போன்ற கோரிக்கைகள் முன்வைக்கப்பட்டதை தொடர்ந்து அதற்கான தீர்வுக்காண தொடர்புடைய அலுவலர்கள் உடனடியாக கள ஆய்வு செய்து உரிய தீர்வு வழங்கிட வேண்டும்.

இவ்வாறு அவர் பேசினார்.

பின்னர் பயனாளிகளுக்கு விலையில்லா தையல் இயந்திரங்களை தமிழ்நாடு மாநில சிறுபான்மையினர் ஆணையத்தலைவர் அருட்தந்தை சொ.ஜோ.அருண்,சே.ச வழங்கினார்.

இந்நிகழ்ச்சியில் தமிழ்நாடு மாநில சிறுபான்மையினர் ஆணைய உறுப்பினர்கள் நாகூர் அ.ஹ.நஜிமுதீன்,பிரவீன் குமார் டாட்டியா,ராஜேந்திர பிரசாத்,ஜெ.முகமது ரஃபி,சு.வசந்த்,இராமநாதபுரம் நாடாளுமன்ற உறுப்பினர் கே.நவாஸ்கனி,மாவட்ட காவல் கண்காணிப்பாளர் ஜி.சந்தீஷ் ஐ.பி.எஸ்,மாவட்ட வருவாய் அலுவலர் வ.சங்கரநாராயணன்,மாவட்ட பிற்படுத்தப்பட்டோர் நல அலுவலர் இராஜா,மற்றும் அரசு அலுவலர்கள், சிறுபான்மையின அமைப்பு பிரதிநிதிகள் உட்பட பலர் கலந்து கொண்டனர்.