இராமநாதபுரம் அருகே சுதந்திரம் அடைந்த பிறகு முதன்முறையாக கிராமத்திற்கு பஸ் சேவை-அமைச்சர் ஆர்.எஸ்.ராஜகண்ணப்பனுக்கு பொதுமக்கள் நன்றி!!!
இராமநாதபுரம் மாவட்டம் சாயல்குடி அருகே வாலிநோக்கம் கிராமத்திலிருந்து அடஞ்சேரி,கிருஷ்ணாபுரம்,சேரந்தை,தேனாங்குறிச்ச மற்றும் ஏர்வாடி வழியாக இராமநாதபுரம் செல்ல பேருந்து சேவை வேண்டுமென அப்பகுதி மக்கள் வனம் மற்றும் கதர் கிராம தொழில் வாரிய துறை அமைச்சர் ஆர்.எஸ்.ராஜகண்ணப்பனுக்கு தொடர்ந்து கோரிக்கை விடுத்து வந்தனர்.
பொதுமக்களின் கோரிக்கை சம்பந்தமாக பரிசீலனை செய்து கிராமங்களுக்கு பேருந்து வசதி செய்து தர வேண்டும் என போக்குவரத்து துறை அதிகாரிகளுக்கு அமைச்சர் உத்தரவிட்டார்.
அதன் பேரில் வாலிநோக்கம் கிராமத்தில் இருந்து அடஞ்சேரி,கிருஷ்ணாபுரம்,சேரந்தை,சேனாங்குறிச்சி மற்றும் ஏர்வாடி வழியாக மாணவ,மாணவிகள் பள்ளி செல்வதற்கும், தொழிலாளர்கள் வேலைக்குச் செல்ல ஏதுவாகவும் காலை மாலை இரண்டு வேளையில் பேருந்து இயக்குவதற்கு போக்குவரத்து அதிகாரிகள் நடவடிக்கை எடுத்தனர்.
அதன்படி நேற்று முன்தினம் கிராமங்களுக்கு பேருந்து சேவை தொடங்கப்பட்டது. புதியதாக வந்த பேருந்தை மாலை அணிவித்து தேங்காய் பழம் சூடம் வைத்து வணங்கி பேருந்து டிரைவர் மற்றும் கண்டக்டருக்கு சால்வை அணிவித்து கிராம மக்கள் மரியாதை செலுத்தி வரவேற்றனர். சுதந்திரம் அடைந்து முதன்முறையாக மேற்கண்ட கிராமங்களுக்கு பேருந்து சேவை தொடங்க உறுதுணையாக இருந்து நடவடிக்கை எடுத்த அமைச்சர் ஆர்.எஸ்.ராஜகண்ணப்பனுக்கு பொதுமக்கள் நன்றி தெரிவித்தனர்.
இந்நிகழ்வின் போது போக்குவரத்து தொழிற்சங்க செயலாளர் பச்சமால்,முதுகுளத்தூர் சட்டமன்ற உறுப்பினர் அலுவலக ஊழியர்கள் டோனி சார்லஸ்,சத்தியேந்திரன், ரஞ்சித் மணிகண்டன் மற்றும் கிராம மக்கள் திரளாக பங்கேற்றனர்.
