இராமநாதபுரம் மாவட்டத்தில் காலி மதுபான புட்டிகளை திரும்ப பெறும் திட்டம்:கலெக்டர் தகவல் 

இராமநாதபுரம் மாவட்ட கலெக்டர் சிம்ரன்ஜீத் சிங் காலோன் வெளியிட்டுள்ள செய்திக்குறிப்பில் தெரிவித்ததாவது:-

தமிழ்நாடு மாநில வாணிபக் கழகம், இராமநாதபுரம் மாவட்டத்தில் மொத்தம் செயல்பட்டு வரும் 109 மதுபான சில்லறை விற்பனை கடைகளில் மாண்பமை சென்னை உயர்நீதிமன்ற வழிகாட்டு நெறிமுறைகளின்படி,மது நுகர்வோர் விட்டுச்செல்லும் காலி மதுபான புட்டிகள் காரணமாக ஆங்காங்கே உடைந்து கிடந்து பொது மக்களுக்கும்,வன விலங்குகளுக்கும் சுற்று சூழலுக்கும் பாதிப்பு ஏற்படுத்துவதை தடுக்கும் பொருட்டு இராமநாதபுரம் மாவட்டத்தில் செயல்பட்டு வரும் அனைத்து மதுபான சில்லறை விற்பனை கடைகளிலும் “காலி மதுபான புட்டிகளை திரும்ப பெறும் திட்டம்” 26.11.2025 அன்று முதல் அமல்படுத்தப்படவுள்ளது.

“காலி மதுபான புட்டிகளை திரும்ப பெறும்” திட்டத்தின் கீழ் மதுபானத்தின் அதிகபட்ச சில்லறை விற்பனை விலையைவிட (MRP) கூடுதலாக கடை எண் பொறிக்கப்பட்ட ரூ.10/-க்கான சிறப்பு ஒட்டுவில்லைகள் (Stickers) ஒட்டி மதுபானங்கள் விற்பனை செய்யப்படும்.மது நுகர்வுக்கு பின்னர் காலி புட்டிகளை ஒப்படைக்கும் பட்சத்தில் அவர்கள் செலுத்திய கூடுதல் தொகை ரூ.10/- திரும்ப அவர்களிடமே வழங்கப்படும்.இதனால் வயல்வெளிகள்,தெருவோரங்கள் ஆகியவற்றில் உடைந்த மதுபான காலி புட்டிகள் கிடந்து பொது மக்களுக்கும், வன விலங்குகளுக்கும் மேலும் சுற்றுச்சூழல் பாதிப்பு ஏற்படுவது தடுக்கப்படும்.இத்திட்டம் தமிழ்நாட்டில் பல்வேறு மாவட்டங்களில் செயல்பட்டு வரும் நிலையில் இராமநாதபுரம் மாவட்டத்தில் உள்ள அனைத்து மதுபான சில்லறை விற்பனை கடைகளிலும் “காலி மதுபான புட்டிகளை திரும்ப பெறும் திட்டம்” 26.11.2025 அன்று முதல் அமல்படுத்தப்படவுள்ளது.

இவ்வாறு அந்த செய்திக்குறிப்பில் தெரிவிக்கப்பட்டுள்ளது.