இராமேஸ்வரம் பகுதியில் சட்ட விரோத மது விற்பனையாளர்களை வேட்டையாடிய போலீசார்:போலீஸ் சூப்பிரண்டு ஜி.சந்தீஷ் ஐ.பி.எஸ்க்கு பா.ம.க சார்பில் நன்றி!!!

இராமநாதபுரம் மாவட்டம் இராமேஸ்வரம் சேராந்தோப்பு பகுதியில் கடந்த 19.11.2025 அன்று 12-ம் வகுப்பு மாணவி ஷாலினியை தன்னை காதலிக்க மறுத்த ஒரே காரணத்திற்காக அதே பகுதியைச் சேர்ந்த முனியராஜ் என்பவர் வழிமறித்து கத்தியால் குத்திக் படுகொலை செய்தார்.

அதனைத் தொடர்ந்து பாட்டாளி மக்கள் கட்சி தலைவர் மருத்துவர் அன்புமணி இராமதாஸ் ஆணைக்கிணங்க படுகொலை செய்யப்பட்ட மாணவியின் தாய்,தந்தையரை நேரில் சந்தித்து ஆறுதல் தெரிவித்த இராமநாதபுரம் கிழக்கு மாவட்ட பா.ம.க செயலாளர் தேனி சை.அக்கிம் பாட்டாளி மக்கள் கட்சி உங்களுக்கு உறுதுணையாக என்றென்றும் இருக்கும் என வாக்குறுதி அளித்தார்.மேலும் கடந்த 20.11.2025 அன்று மாவட்ட கலெக்டர் சிம்ரன்ஜீத் சிங் காலோன் ஐ.ஏ.எஸ் மற்றும் போலீஸ் சூப்பிரண்டு ஜி.சந்தீஷ் ஐ.பி.எஸ் ஆகியோரை நேரில் சந்தித்து சேராந்தோப்பு பகுதியில் மேல்நிலைப்பள்ளி அமைத்தல்,பேருந்து வசதி செய்து தருதல் மற்றும் அப்பகுதியில் கொடிகட்டிப் பறக்கும் சட்டவிரோத மது விற்பனைதான் மாணவியின் படுகொலைக்கு மூல முதற்காரணம் எனவும் விளக்கியதுடன்,கொலையுண்ட மாணவியின் குடும்பத்தினரின் கோரிக்கையை அரசின் கவனத்திற்கு கொண்டு சென்றார்.சட்ட விரோத மது உள்ளிட்ட போதைப் பொருட்கள் விற்பனையில் ஈடுபடுவோரை குண்டர் சட்டத்தில் கைது செய்வதுடன்,அவர்களது சொத்துகளை பறிமுதல் செய்ய வேண்டும் எனவும் அந்த கோரிக்கை மனுவில் கூறியிருந்தார்.

அதனைத் தொடர்ந்து சட்டவிரோத மது மற்றும் போதை பொருட்கள் விற்பனையில் ஈடுபடுவோரை மாவட்ட காவல்துறை அன்றைய தினத்திலிருந்து கண்காணிக்க தொடங்கினர்.காவல்துறையினரின் தீவிர கண்காணிப்பில் இராமேஸ்வரம் தீவுப் பகுதி முழுவதும் சட்டவிரோத மது மற்றும் போதை பொருட்கள் விற்பனை கொடிகட்டிப் பறந்தது தெரிய வந்தது.நேற்று அப்பகுதியில் சட்டவிரோத மது மற்றும் போதை பொருட்கள் விற்பனையில் ஈடுபட்ட நபர்கள் 10-க்கும் மேற்பட்டோரை போலீசார் கைது செய்திருப்பது அப்பகுதி மக்களிடையே பெரும் வரவேற்பை பெற்றுள்ளது.

இது குறித்து பாட்டாளி மக்கள் கட்சியின் இராமநாதபுரம் கிழக்கு மாவட்ட செயலாளர் தேனி சை.அக்கிம் செய்தியாளர்களிடம் கூறியதாவது:-

கடந்த 19.11.2025 அன்று இராமேஸ்வரம் சேராந்தோப்பு பகுதியில் ஒருதலைக் காதலால் மேல்நிலைப்பள்ளி மாணவி ஷாலினி அதே பகுதியைச் சேர்ந்த முனியராஜ் என்பவரால் படுகொலை செய்யப்பட்டார்.இச்சம்பவமானது இராமநாதபுரம் மாவட்டம் மட்டுமின்றி ஒட்டுமொத்த தமிழகத்தையும் கடும் அதிர்ச்சிக்குள்ளாக்கியது.அதனை தொடர்ந்து எங்கள் தலைவர் அண்ணன் மருத்துவர் அன்புமணி இராமதாஸ் ஆணைக்கிணங்க பாதிக்கப்பட்ட மாணவியின் குடும்பத்தினரை நேரில் சந்தித்து ஆறுதல் தெரிவித்ததோடு மட்டுமின்றி கொலைக்கான காரணம் குறித்து கேட்டறிந்தோம்.மாணவியின் பெற்றோர் கொலைக்கான முக்கிய காரணம் சட்டவிரோத மது விற்பனைதான் என்பதை ஆணித்தரமாக எங்களிடம் தெரிவித்தனர்.அவர்களிடம் நிறை,குறைகளை கேட்டறிந்து அன்று மறுநாளே கடந்த 20.11.2025 அன்று கொலையுண்ட மாணவி ஷாலினியின் குடும்பத்தினர் கோரிக்கையை ஏற்று இராமநாதபுரம் கிழக்கு மாவட்ட பாட்டாளி மக்கள் கட்சி சார்பில் மாவட்ட கலெக்டர் சிம்ரன்ஜீத் சிங் காலோன் ஐ.ஏ.எஸ் மற்றும் போலீஸ் சூப்பிரண்டு ஜி.சந்தீஷ் ஐ.பி.எஸ் ஆகியோரிடம் அப்பகுதியின் பிரச்சினைகள் அடங்கிய மனுவினை வழங்கினோம்.பாட்டாளி மக்கள் கட்சியின் கோரிக்கையை ஏற்று நேற்றைய தினம் இராமேஸ்வரம் சேராந்தோப்பு பகுதியில் சட்டவிரோத மது மற்றும் போதை பொருட்கள் விற்பனையில் ஈடுபட்ட10-க்கும் மேற்பட்டோரை போலீசார் தட்டி தூக்கியிருப்பதை வரவேற்று துரித நடவடிக்கை மேற்கொண்ட காவல்துறையினருக்கு எங்கள் கட்சியின் சார்பாக நன்றிகளையும் தெரிவித்து கொள்கிறோம்.மேலும் கைதான சட்டவிரோத மது மற்றும் போதைப்பொருட்கள் விற்பனையாளர்கள் மீது குண்டர் தடுப்பு சட்டத்தின் கீழ் வழக்குப்பதிவு செய்து அவர்களது அசையும்,அசையா சொத்துக்களை அனைத்தையும் பறிமுதல் செய்ய வேண்டும் எனவும் இந்நேரத்தில் மாவட்ட நிர்வாகத்திற்கும்,மாவட்ட காவல்துறைக்கும் கோரிக்கையாக முன் வைக்கிறேன்.காவல்துறை நினைத்தால் எப்படிப்பட்ட சட்டவிரோத செயல்களுக்கும் முற்றுப்புள்ளி வைக்க இயலும் என்பதற்கு இந்த கைது சம்பவம் முன்னுதாரணம்.மேலும் இனி வரும் காலங்களில் இது போன்ற சட்டவிரோத செயல்கள் நடக்காமலிருக்க தண்டனைகள் கடுமையாக்கப்பட வேண்டும்.”காப்பவர் கடவுள் என்றால் காக்கிகளும் கடவுளே” என்ற பழமொழிக்கேற்ப அப்பகுதி மக்கள் நிம்மதியாக வாழ துரிதமாக செயல்பட்டு நடவடிக்கை மேற்கொண்ட போலீஸ் சூப்பிரண்டு ஜி.சந்தீஷ் ஐ.பி.எஸ் தலைமையிலான ஒட்டு மொத்த மாவட்ட காவல்துறையினருக்கும் பாட்டாளி மக்கள் கட்சியின் சார்பாகவும்,அப்பகுதி மக்களின் சார்பாகவும் மீண்டும் ஒரு முறை நன்றியைத் தெரிவித்துக் கொள்கிறேன்.

இவ்வாறு அவர் கூறினார்.