இராமநாதபுரம் மாவட்டத்தில் திருக்குறள் முற்றோதல் நிகழ்வு:மாணவ,மாணவிகள் விண்ணப்பிக்க மாவட்ட ஆட்சியர் அழைப்பு!!!

இராமநாதபுரம் மாவட்ட ஆட்சித்தலைவர் சிம்ரன்ஜீத் சிங் காலோன் வெளியிட்டுள்ள செய்திக்குறிப்பில் தெரிவித்ததாவது:-

உலகப் பொதுமறையாம் மக்களின் வாழ்க்கைக்கு வழிகாட்டியாக விளங்கும் திருக்குறளின் சீரிய கருத்துகளை இளம் தலைமுறையினரின் மனதில் பதியச் செய்து அவர்களை நல்வழிப்படுத்தும் நோக்கில் 1330 குறட்பாக்களையும் மனனம் செய்து முழுமையாக ஒப்பிக்கும் திறன் கொண்ட பள்ளி மாணவர்களுக்கு ஆண்டுதோறும் தமிழ் வளர்ச்சித்துறையால் குறள் பரிசாக ரூ.15000/- (ரூபாய் பதினைந்தாயிரம் மட்டும்) வழங்கப்பட்டு வருகிறது. அவ்வகையில் 2025-26-ம் ஆண்டிற்கான குறள்பரிசு வழங்கும் பொருட்டு தகுதியான மாணவ, மாணவியரிடமிருந்து விண்ணப்பங்கள் வரவேற்கப்படுகின்றன.1330 குறட்பாக்களையும் ஒப்பிக்கும் மாணவர்களுக்குப் பரிசுத்தொகையாக ரூ.15000/- (ரூபாய் பதினைந்தாயிரம் மட்டும்) வழங்கப்பெறும். விண்ணப்பங்களை 14.11.2025-க்குள் https://tamilvalarchithurai.org/tkm என்ற இணையவழியிலும் தமிழ் வளர்ச்சி உதவி இயக்குநர்,தமிழ் வளர்ச்சி உதவி இயக்குநர் அலுவலகம், மாவட்ட ஆட்சியரகம், இராமநாதபுரம் என்ற முகவரிக்கு நேரிலோ/அஞ்சல் மூலமாகவோ/tamilvalarchiramnad@gmail.com என்ற மின்னஞ்சல் முகவரிக்கு மின்னஞ்சல் மூலமாகவோ அனுப்பப் பெற வேண்டும்.திருக்குறள் முற்றோதல் நிகழ்வு 05.12.2025 தமிழ் வளர்ச்சி உதவி இயக்குநர் அலுவலகத்தில் நடைபெறவுள்ளது.

இவ்வாறு அந்த செய்திக்குறிப்பில் தெரிவிக்கப்பட்டுள்ளது.