இராமநாதபுரம் மாவட்டத்தில் தமிழ்நாடு மகளிர் தொழில் முனைவோர் மேம்பாட்டுத் திட்டத்தின் கீழ் தொழில் தொடங்க கடன்:பயன் பெற கலெக்டர் அழைப்பு!!! 

இராமநாதபுரம் மாவட்ட கலெக்டர் சிம்ரன்ஜீத் சிங் காலோன் வெளியிட்டுள்ள செய்திக்குறிப்பில் தெரிவித்ததாவது:-

தமிழ்நாட்டில் பொருளாதார வளர்ச்சியில் பெண்களின் பங்கு மேலும் அதிகரிக்க வேண்டும் என்ற நோக்கத்துடன்,அடுத்த ஐந்து ஆண்டுகளில் ஒரு இலட்சம் மகளிரை தொழில் முனைவோராக உயர்த்திடும் தமிழ்நாடு மகளிர் தொழில் முனைவோர் மேம்பாட்டுத் திட்டம் (TWEES) என்ற சிறப்பான திட்டம் தமிழ்நாடு அரசால் அறிவிக்கப்பட்டுள்ளது.

இத்திட்டத்தின் மூலம் உற்பத்தி,சேவை மற்றும் வியாபாரத் தொழில்களுக்கு ரூ.10.00 இலட்சம் வரை பிணையம் இல்லாமல் வங்கி கடன் உதவி பெறலாம். இத்திட்டத்தின் மூலம் திட்ட மதிப்பீட்டில் 25% அரசு மானியம் அதிகபட்சமாக ரூ.2.00 இலட்சம் வரை வழங்கப்படும்.

இத்திட்டத்தில் விண்ணப்பிக்க தமிழ்நாட்டில் வசிப்பவராக இருக்க வேண்டும்.கல்வித் தகுதி தேவையில்லை. மேலும் வயது வரம்பு 18 வயது முதல் 55 வயதிற்குள் இருக்க வேண்டும். வருமான உச்சவரம்பு இல்லை. ஆதிதிராவிடர், பழங்குடியினர்,திருநங்கைகள், கைம்பெண்கள், வறுமைகோட்டிற்கு கீழே உள்ளவர்கள் மற்றும் மாற்றுத்திறனாளிகளுக்கு முன்னுரிமை வழங்கப்படும். www.msmeonline.tn.gov.in/twees என்ற இணையதளம் வாயிலாக மட்டுமே விண்ணப்பிக்க வேண்டும்.

இத்திட்டத்தில் கடன் பெற்று தொழில் தொடங்க விரும்புவோர் இராமநாதபுரம் மாவட்ட கலெக்டர் அலுவலக வளாகத்தில் உள்ள மாவட்ட தொழில் மைய அலுவலகத்தை 04567-230497 என்ற தொலைபேசி எண்ணிலோ அல்லது 8925533983, 8925533984 அலைபேசி எண்ணிலோ தொடர்பு கொள்ளலாம்.

இவ்வாறு அந்த செய்திக்குறிப்பில் தெரிவிக்கப்பட்டுள்ளது.