விடுதலை சிறுத்தைகள் கட்சி தலைவர் தொல்.திருமாவளவனுக்கு உயர் அடுக்கு பாதுகாப்பு வழங்க வேண்டும்-தமிழர் அதிகாரம் தலைவர் இரா.சு.அழகர்சாமி பாண்டியன் கோரிக்கை!!!

தமிழர் அதிகாரம் அமைப்பின் தலைவர் இரா.சு.அழகர்சாமி பாண்டியன் மத்திய,மாநில அரசுகளுக்கு விடுத்துள்ள கோரிக்கையில் கூறியதாவது:-

தமிழ்க்குடியின் தனிப்பெரும் தலைவர்களில் ஒருவரும்,பாராளுமன்ற உறுப்பினரும் விடுதலைச்சிறுத்தைகள் கட்சியின் தலைவருமான தொல்.திருமாவளவன் அவர்களின் அரசியல் நிலைப்பாடுகளில் நமக்கு மாறுபட்ட கருத்துக்கள் இருப்பினும்,மாண்புமிகு உச்சநீதிமன்ற தலைமை நீதிபதி மீது வழக்கறிஞர் காலனி வீசியதற்கு எதிர்ப்பினை தெரிவிக்கும் வகையில் கடந்த 7-ஆம் தேதி சென்னை உயர் நீதின்றம் அருகே

நடைபெற்ற கண்டன ஆர்ப்பாட்டத்தில் வி.சி.க தலைவர் தொல்.திருமாவளவன் கலந்து கொண்டு கண்டன சிறப்புரை ஆற்றிவிட்டு தனது வாகனத்தில் சாலையில் பயணித்த பொழுது, திட்டமிட்டு உள்நோக்கத்தோடு தொல்.திருமாவளவன் வாகனத்திற்கு முன்பாக தனது பைக்கை நிறுத்திய ஒரு நபர் அவரை காரை விட்டு இறங்கச் சொல்லி சைகையுடன் முன்னோக்கி பாய்ந்த பொழுது பாதுகாப்பிற்காக அவருடன் பயணித்த தொண்டர்களும் வழக்கறிஞர்களும் காவல்துறையை சேர்ந்தவர்களும், மேற்படி நபரை அவ்விடத்தை விட்டு விரட்டி அப்புறப்படுத்தினர். 

மேற்படி நபர் பெயர் மற்றும் முகவரி அவரின் தொழில் அனைத்தும் ஊடகங்கள் வாயிலாகவும் அவருடைய உறவினர்கள் வாயிலாகவும் பின்பு சமூக வலைத்தளத்திலும் தொலைக்காட்சி சேனல்களிலும் பரவியது, அதில் தற்காலிக நீக்கம் செய்யப்பட்ட வழக்கறிஞரான அவர் மீது பல வழக்குகளும்,குற்றச்சாட்டுகளும் இருப்பது தெரியவந்தது.அனைத்து ஊடகங்களிலும் இச்செய்தி பரப்பப்பட்டதை எமது தமிழர் அதிகாரம் கூர்மையாக கவனித்ததில் மேற்படி நபர் திட்டமிட்டே இச்செயலை செய்ததாகவே கருத முடிகிறது.அதேவேளை நாடறிந்த மக்கள் பிரதிநிதியை ஒரு சாதாரண நபர் தாக்கும் நோக்கில் வெகு இலகுவாக நெருங்க முற்பட்டது பெரும் அதிர்ச்சி அளிக்கக் கூடிய விடயமாகும்.

வாகனத்தில் தலைவர் உள்ளார் என்பதை அறிந்தே செய்த இச்செயல் வன்மையாக கண்டனத்திற்கு உரியது ஆகும்.இது போன்ற நபர்கள் மனரீதியாக சாதிய உணர்வு அதிகம் உள்ளவர்களாகவும் தொல்.திருமாவளவன் சாதி கடந்த தலைவர் என்பதை ஏற்றுக்கொள்ளும் பக்குவம் இல்லாதவர்களாகவும் இருப்பவர்கள் ஆவார்.இத்தகைய நபர்கள் வழக்கறிஞர்களாகவும்,படித்தவர்களாகவும் இருந்தாலும் அவர்களின் சாதிய குணத்தை கைவிடாது இறுக பற்றி கொண்டு வாய்ப்பு கிடைக்கிற போதெல்லாம் தமிழ் சமூக ஓர்மையை கெடுக்கக்கூடியவர்களாக உள்ளனர். இத்தகைய நபர்கள் தமிழ் சமூகத்தில் தற்போது அதிகமாக வளர்ந்து வருகின்றனர்.குறிப்பிட்ட சம்பவத்தை மையப்படுத்தி இரண்டு தரப்பினரும் சாதிரீதியாக மோதிக் கொள்வதற்கு முதல் தூபமிட்டவர் மேற்படி சம்பவத்தில் ஈடுபட்ட வழக்கறிஞர் ராஜீவ் காந்தி ஆவார்.அவருக்குப் பின்புலமாக சாதி ரீதியாக வழக்கறிஞர்கள் திரண்டு அவருக்கு ஆதரவினை தெரிவித்ததை தமிழ் சமூகம் முகம் சுளித்தே ஏற்றுக்கொண்டது.

வழக்கறிஞர்,பாராளுமன்ற உறுப்பினர்,அரசியல் கட்சியின் தலைவர்,எழுத்தாளர் பேச்சாளர் இதழாளர்,முனைவர் என பன்முகத் தன்மையில் விரிவடையும் திரு.தொல் திருமாவளவன் மீதான இத்தகைய குறுகிய மனப்போக்கினை தமிழ்ச் சமூகம் வரும் காலங்களில் மாற்றிக் கொள்ள வேண்டும்.திருமாவளவன் மற்றும் அவர் சார்ந்த இருக்கக்கூடிய அரசியல் கட்சி அவை எடுக்கும் நிலைப்பாடுகள் மீது பல்வேறு விமர்சனங்கள் இருந்தாலும்,மேற்காணும் சம்பவங்கள் அதை ஒட்டி அவருக்கு ஏற்படுத்திய நெருக்கடிகள் ஊடகத்தினர் அவர் மீது எழுப்பிய மிகவும் அருவருக்கத்தக்க கேள்விகள் ஆகியவை எல்லாம் அவரை சாதிய வன்மத்தோடு அணுகுவது என்கிற நிலைப்பாடு தானே ஒழிய வேறு ஒன்றும் இல்லை என்பதை எமது தமிழர் அதிகாரம் வாயிலாக தெரிவித்துக் கொள்கிறோம்.

மற்ற தலைவர்களுக்கும் தொல்.திருமாவளவனுக்கும் சமூக மதிப்பீடுகள் பொதுமக்கள் மீதான பார்வைகள் இவற்றில் எல்லாம் பல்வேறு உடன்பாடுகளும் இடர்பாடுகளும் இருப்பதை தொடர்ந்து உன்னிப்பாக கவனித்துக் கொண்டுதான் இருக்கிறோம்.இத்தகைய போக்கினை தமிழ் சமூகம் கைவிடவும்,சாதி அரசியலை கையில் எடுக்காமல் பொதுவான அரசியலை கையில் எடுத்து அரசியல் செய்ய வரும் அனைத்து தமிழ் சாதி உறவுகளையும் ஒரே நிலைப்பாட்டில் பொது சமூகம் அணுக இந்த அறிக்கையின் வாயிலாக கேட்டுக் கொள்வதோடு.அரசின் காவல்துறையினரின் ஒரு பக்கச்சார்பான பாரபட்ச நடவடிக்கைகளால் ஏற்கனவே தொல்குடி மக்களின் மேன்மைக்காய் பாடாற்றிய பல தலைவர்களை தமிழகம் இழந்திருப்பதை யாவரும் அறிவர்.குறிப்பிட்ட இச்சம்பவத்தில் கூட காவல்துறையினரின் கவனக்குறைவும்,பாதுகாப்புக் குளறுபடிகளும் அப்பட்டமாக தெரிகிறது.தொல்.திருமாவளவனின்பாதுகாப்பை உறுதிப்படுத்திட உயர் அடுக்கு பாதுகாப்பு வழங்கிட மத்திய,மாநில அரசுகளையும் காவல்துறை இயக்குனரையும் கேட்டுக்கொள்கிறேன்.

இவ்வாறு அந்த கோரிக்கையில் கூறப்பட்டுள்ளது.