இராமநாதபுரம் புதிய பேருந்து நிலையத்திற்கு கருணாநிதி பெயர் வைத்ததற்கு பதிலாக டாஸ்மாக் கடைகளுக்கு கருணாநிதி சாராயக்கடை என்று பெயர் வைத்திருக்கலாம்:பாட்டாளி மக்கள் கட்சி மாவட்ட செயலாளர் தேனி.சை.அக்கீம் ஆவேச பேட்டி!!!

இராமநாதபுரம் புதிய பேருந்து நிலையத்திற்கு கருணாநிதி பெயரை வைத்ததற்கு பதிலாக டாஸ்மாக் கடைகளுக்கு கருணாநிதி சாராயக்கடை என்று வைத்திருக்கலாம் என்று பாட்டாளி மக்கள் கட்சியின் இராமநாதபுரம் கிழக்கு மாவட்ட செயலாளர் தேனி சை.அக்கீம் ஆவேசமாக பேட்டியளித்துள்ளார்.

ராமநாதபுரத்தில் புதிய பேருந்து நிலையம் ரூ.20 கோடி மதிப்பீட்டில் கட்டப்பட்டு அதனை கடந்த 3.10.2025 தமிழ்நாடு முதல்-அமைச்சர் மு.க.ஸ்டாலின் திறந்து வைத்தார்.

இந்த பேருந்து நிலையம் கட்டி முடிக்கப்பட்ட நாள் முதலே பல்வேறு சர்ச்சைகளில் இருந்து வந்தது.ராமநாதபுரம் தி.மு.க மாவட்ட செயலாளர் காதர்பாட்சா முத்துராமலிங்கம் எம்.எல்.ஏ வணிக வளாகம் போல பேருந்து நிலையத்தை கட்டி வியாபார நோக்கத்துடன் பல லட்சங்களை லஞ்சமாக பெற்று கட்சிக்காரர்களுக்கும்,வேண்டியவர்களுக்கும் கடையை ஒதுக்கி கொடுத்ததாகவும் குற்றச்சாட்டு எழுந்தது.இதற்கெல்லாம் நாங்கள் அசந்தவர்களா என்பது போல தான் நினைத்ததை எம்.எல்.ஏ தரப்பினர் கச்சிதமாக நடத்தி முடித்து தற்போது புதிய பேருந்து நிலையம் பயன்பாட்டுக்கு வந்துள்ளது.மேலும் புதிய பேருந்து நிலையத்திற்கு சுதந்திர போராட்ட வீரர் மாமன்னர் ரிபெல் முத்துராமலிங்க விஜய ரெகுநாத சேதுபதி பெயரை சூட்ட சமுதாயம் சார்ந்த அமைப்பினர் உட்பட பல்வேறு தரப்பினர் கோரிக்கை விடுத்து வந்தனர்.

இதில் பாட்டாளி மக்கள் கட்சி சார்பிலும் மாவட்ட ஆட்சியர் சிம்ரன்ஜீத் சிங் காலோனிடம் மனு அளிக்கப்பட்டது.ஆனால் பேருந்து நிலையம் திறப்பதற்கு ஒரு நாள் முன்பு வரை அனைத்து தரப்பு கோரிக்கையும் ஏற்று சுதந்திர போராட்ட வீரர் மாமன்னர் ரிபெல் முத்துராமலிங்க விஜய ரெகுநாத சேதுபதி பெயரை சூட்டுவதாக அறிவிக்கப்பட்டிருந்தது.ஆனால் ஆளும் கட்சி மாவட்ட செயலாளர் காதர்பாட்சா முத்துராமலிங்கம் எம்.எல்.ஏவுக்கு என்ன நிர்பந்தமோ தெரியவில்லை தமிழக முன்னாள் முதல்வர் கருணாநிதி பெயரை இரவோடு இரவாக சூட்டி பெயர்ப்பலகை வைக்கப்பட்டது.இதற்கு பல்வேறு அ.தி.மு.க,பா.ம.க,பா.ஜ.க போன்ற‌ எதிர்கட்சிகளும்,பல்வேறு சமுதாயம் சார்ந்த அமைப்புகளும் அமைப்புகளும் ஆளும் கட்சியை சமூக வலைதளங்களில் துவைத்து எடுத்தனர்.

இந்நிலையில் பாட்டாளி மக்கள் கட்சி இராமநாதபுரம் கிழக்கு மாவட்ட செயலாளர் தேனி சை.அக்கீம் நமது “அதிரடி செய்தி” இதழுக்கு அளித்த சிறப்பு பேட்டியில் கூறியதாவது:-

ராமநாதபுரம் புதிய பேருந்து நிலையத்திற்கு சுதந்திரத்திற்காக 28 ஆண்டுகள் சிறை வாசம் அனுபவித்து இன்னுயிர் நீத்த விடுதலைப் போராட்ட வீரர் மாமன்னர் ரிபெல் முத்துராமலிங்க விஜய ரெகுநாத சேதுபதி பெயரை சூட்ட பாட்டாளி மக்கள் கட்சி உட்பட பல்வேறு அரசியல் கட்சிகள்,சமுதாய அமைப்புகள் கோரிக்கை விடுத்து வந்த நிலையில் அதற்கு சற்றும் செவிசாய்க்காத இந்த விடியா தி.மு.க அரசு முன்னாள் முதல்வர் கருணாநிதியின் பெயரை இரவோடு இரவாக திருட்டுத்தனமாக சூட்டியிருப்பது வெட்கப்பட வேண்டிய விஷயம்.ரூ.20 கோடி மதிப்பீட்டில் பொதுமக்களின் வரிப்பணத்தில் கட்டப்பட்ட பேருந்து நிலையத்திற்கு கருணாநிதி பெயரை சூட்டுவது எந்த வகையிலும் ஏற்புடையதல்ல.வேண்டுமென்றால் தமிழ்நாடு முதல்வர் மு.க.ஸ்டாலின் அவரது சொந்த பணத்தில் செலவு செய்து பேருந்து நிலையத்தை புனரமைத்து அவரது தந்தை பெயரை வைக்கட்டும்.வரலாற்று சிறப்பு மிக்க ராமநாதபுரம் மாவட்டத்தில் மக்களுக்காக தங்களது சொத்துகளை கொடுத்து விடுதலை போராட்டத்தில் இன்னுயிர் நீத்த மாமன்னர் ரிபெல் முத்துராமலிங்க விஜய ரெகுநாத சேதுபதி,முன்னாள் குடியரசுத் தலைவர் ஏவுகணை நாயகன் டாக்டர் ஏ.பி.ஜே.அப்துல் கலாம் போன்று பல்வேறு நபர்கள் இருக்கும் போது தமிழ்நாட்டில் சாராய விற்பனையை ஊக்குவித்து கஜானாவை நிரப்புவது,கனிம வளங்களை கொள்ளையடித்து கல்லா கட்டுவது போன்ற ஈனத்தனமான செயல்களில் ஈடுபட்டு லட்சக்கணக்கான தமிழ்நாட்டு பெண்கள்  தாலியறுக்க காரணமாக இருந்த கருணாநிதி பெயரை வைப்பது உள்ளபடியே இராமநாதபுரம் மாவட்டத்திற்கே அசிங்கம்.வேண்டுமானால் ஆளும் தி.மு.க அரசு நிர்வகிக்கக் கூடிய டாஸ்மாக்கிற்கு கருணாநிதி சாராயக் கடை என்று பெயர் வைத்தால் பொருத்தமாக இருக்கும்.இவ்வாறு மாவட்ட மக்களின் மனதை புரிந்து கொள்ளாத தி.மு.க அரசு மீண்டும் இராமநாதபுரம் மாவட்டத்தில் தலைதூக்காது.நான்கு சட்டமன்ற தொகுதிகளிலும் மண்ணைக் கவ்வும்.ஆளும் கட்சியின் மாவட்ட செயலாளரான காதர்பாட்சா முத்துராமலிங்கம் எம்.எல்.ஏ இராமநாதபுரம் மாவட்டத்தில் பெருவாரியாக வசிக்கும் தான் சார்ந்த தேவர் சமுதாய மக்களுக்கு பச்சை துரோகம் செய்துள்ளார்.எதிர்வரும் 2026 சட்டமன்ற தேர்தலில் அவரை டெபாசிட் இழக்க செய்து மக்கள் வீட்டிற்கு அனுப்புவது உறுதி.

இவ்வாறு அவர் கூறினார்.