தேசம் போற்றும் தெய்வீகத் திருமகனாக பசும்பொன் முத்துராமலிங்கத் தேவர் திகழ்ந்து வருகிறார்:அமைச்சர் ராஜகண்ணப்பன் பேச்சு!!!

இராமநாதபுரம் மாவட்டம்,பசும்பொன் முத்துராமலிங்கத் தேவரின் 118-வது பிறந்தநாள் விழா மற்றும் 63-வது குருபூஜை விழாவினையொட்டி,275 பயனாளிகளுக்கு ரூ.92.01 இலட்சம் மதிப்பீட்டில் அரசு நலத்திட்ட உதவிகள் வழங்கி,தேசம் போற்றும் தெய்வீக திருமகனாக பசும்பொன் முத்துராமலிங்கத்தேவர் திகழ்ந்து வருகிறார் என வனம் மற்றும் கதர் துறை அமைச்சர் ஆர்.எஸ்.ராஜகண்ணப்பன் புகழாரம் பாடினார்.

இராமநாதபுரம் மாவட்டம்,கமுதி வட்டம், பசும்பொன்னில் இன்று (30.10.2025) பசும்பொன் முத்துராமலிங்கதேவரின் 118-வது பிறந்தநாள் விழா மற்றும் 63-வது குருபூஜை விழாவையொட்டி,அரசு நலத்திட்ட உதவிகள் வழங்கும் நிகழ்ச்சி நடைபெற்றது.இந்நிகழ்ச்சிக்கு மாவட்ட ஆட்சித்தலைவர் சிம்ரன்ஜீத் சிங் காலோன்,இராமநாதபுரம் சட்டமன்ற உறுப்பினர் காதர்பாட்சா முத்துராமலிங்கம்,பரமக்குடி சட்டமன்ற உறுப்பினர் செ.முருகேசன் ஆகியோர் முன்னிலை வகித்தனர்.வனம் மற்றும் கதர் துறை அமைச்சர் ஆர்.எஸ்.ராஜகண்ணப்பன்,தலைமையேற்று பசும்பொன் முத்துராமலிங்கத் தேவரின் திருவுருவப்படத்திற்கு மலர்தூவி மரியாதை செலுத்தியதுடன், பயனாளிகளுக்கு அரசு நலத்திட்ட உதவிகள் வழங்கி பேசினார்.

அப்போது அவர் பேசியதாவது:-

பசும்பொன் முத்துராமலிங்கத்தேவர் திருமகனார் அவர்கள் அனைவரது அன்பைபெற்ற மாபெரும் தலைவராக திகழ்ந்தவர் ஆவார். வெள்ளையர்களை வெளியேற்றி இந்திய சுதந்திர போராட்டத்திற்கு பாடுபட்டு 10ஆண்டுகள் சிறைச்சாலையில் இருந்த தலைவராவார். உடையில் வெண்மை நிறம் இருந்ததுபோல் எண்ணத்திலும், உள்ளத்திலும் வெள்ளை உள்ளம் கொண்ட தலைவராக இருந்து மக்களின் தேவைகளை நிறைவேற்றி தந்த தலைவராக திகழ்ந்தவர் ஆவார்.பொதுமக்களின் பேராதரவுடன் முதுகுளத்தூரில் சட்டமன்ற உறுப்பினராக இருந்து மக்களின் அடிப்படைத் தேவைகளை நிறைவேற்றிதந்ததுடன் பிறரின் தேவைகளை உணர்ந்து அவர்களுக்கான திட்டங்களை செயல்படுத்தி கொடுத்து வந்தார். மேலும் அன்றைய காலகட்டத்தில் அதிக வசதிகளை ஏற்படுத்தி வாழ்ந்திருக்கலாம்.சுகபோகங்களை துறந்து மக்களோடு மக்களாக எளிமையாக வாழ்ந்தவர் ஆவார்.அதன் பயன் அவர் மறைந்தாலும் அவர் பிறந்தநாளையும், அவர் இறந்தநாளையும் வணங்கும் நாளாக மக்கள் வழிபட்டு செல்கிறார்கள்.இத்தகைய தினத்தை அரசு விழாவாக கொண்டாடப்பட்டு வருகிறது.அதிலும் குறிப்பாக மாண்புமிகு முத்தமிழறிஞர் டாக்டர் கலைஞர் அவர்கள் முதலமைச்சராக இருந்தபொழுது 2007-ல் பசும்பொன்னில் நூற்றாண்டு விழா கொண்டாடப்பட்டது.பசும்பொன் முத்துராமலிங்கத்தேவர் அவர்கள் பெயரில் கமுதியில் அரசுகல்லூரி அமைக்கப்பட்டு மதுரை மற்றும் சென்னையில் திருவுருவச்சிலைகள் அமைக்கப்பட்டுள்ளது.இவ்வாறு பசும்பொன் முத்துராமலிங்கத் தேவர் அவர்களின் புகழை பாதுகாக்கும் தலைவராக முத்தமிழறிஞர் டாக்டர் கலைஞர் அவர்கள் இருந்து வந்தார். அதேபோல் மாண்புமிகு தமிழ்நாடு முதலமைச்சர் அவர்களும் பசும்பொன் முத்துராமலிங்கத்தேவர் அவர்களின் தியாகத்தை போற்றிடும் வண்ணம் அன்னாரின் நினைவிடத்தில் முக்கிய பிரமுகர் வந்து செல்லும் பகுதியில் பொதுமக்கள் வழிபடும் வந்துசெல்லும் பகுதியிலும் பாதுகாப்புடன் சென்றுவரும் வகையில் முத்துராமலிங்க தேவர் அவர்களின் நினைவிடத்தில் ரூ.1.55 கோடி செலவில் புதிதாக அமைக்கப்பட்டுள்ள தெய்வீகத் திருமகனார் உ.முத்துராமலிங்கதேவர் அரங்கத்தினை மாண்புமிகு தமிழ்நாடு முதலமைச்சர் அவர்களால் திறந்து வைக்கப்பட்டது.அதேபோல் இந்தாண்டு மாண்புமிகு தமிழ்நாடு முதலமைச்சர் அவர்கள் ரூ.3 கோடி மதிப்பீட்டில் பசும்பொன் முத்துராமலிங்கத் தேவர் அவர்களின் பெயரில் திருமண மண்டபம் கட்டுவதற்கு உத்தரவிட்டுள்ளார்கள்.இதேபோல் பல்வேறு திட்டங்களை தேவரின் திருப்புகழ் பாடும் வண்ணம் மாண்புமிகு தமிழ்நாடு முதலமைச்சர் அவர்கள் திட்டங்களை செயல்படுத்தி வருகிறார்கள்.சாதி பாகுபாடுயின்றி பழகும் தலைவராக திகழ்ந்தவராவர். அதேபோல் பேச்சாற்றல் மிக்க தலைவராகவும் திகழ்ந்தவராவர். தேவரின் வாழ்க்கையை ஒவ்வொருவரும் பின்பற்றும் வகையில் அவரது அறிவாற்றல் தலை நிமிர்ந்து நிற்கின்றது.தேவர் அவர்கள் குறைந்த காலம் வாழ்ந்தாலும் நிறைந்த சாதனைகளைப் படைத்த தேசிய தலைவராக திகழ்ந்தவராவர். தேவர் அவர்களின் புகழ் என்றும் நிலைத்து நிற்கும்.

இவ்வாறு அவர் பேசினார்.

பின்னர் வருவாய் மற்றும் பேரிடர் மேலாண்மைத் துறையின் மூலம் 52 பயனாளிகளுக்கு இலவச வீட்டுமனைப் பட்டா ரூ.52,00,000/- இலட்சம் மதிப்பீட்டிலும், புதிய குடும்ப அட்டை 150 பயனாளிகளுக்கும், கூட்டுறவுத் துறையின் மூலம் 40 பயனாளிகளுக்கு மகளிர் சுய உதவிக்குழு கடன் திட்ட உதவி ரூ.40,00,000/- இலட்சம் மதிப்பீட்டிலும், தோட்டக்கலைத்துறையின் மூலம் 30 பயனாளிகளுக்கு பண்ணைக்குட்டை அமைத்தலும்,வேளாண்மைத்துறையின் மூலம் 03 பயனாளிகளுக்கு உயிர் உரங்கள் வழங்குதல் ரூ.1092/- மதிப்பீட்டிலும் என மொத்தம் 275 பயனாளிகளுக்கு ரூ.92,01,092/- இலட்சம் மதிப்பீட்டிலும் நலத்திட்ட உதவிகளை வனம் அமைச்சர் ஆர்.எஸ்.ராஜகண்ணப்பன் வழங்கினார்.

இந்நிகழ்ச்சியில் மாவட்ட வருவாய் அலுவலர் (பொ) சா.புகாரி,பரமக்குடி வருவாய் கோட்டாட்சியர் ஞா.சரவண பெருமாள்,மாவட்ட சமூக பாதுகாப்புத்திட்ட தனித்துணை ஆட்சியர் கிருஷ்ணகுமாரி,உதவி இயக்குநர் (ஊராட்சிகள்) பத்மநாபன்,செய்தி மக்கள் தொடர்பு அலுவலர் லெ.பாண்டி,கமுதி வட்டாட்சியர் ஸ்ரீராம்,கமுதி வட்டார வளர்ச்சி அலுவலர்கள் சந்திரசேகர்,லெட்சுமி,உதவி மக்கள் தொடர்பு அலுவலர் (செய்தி) விஜயகுமார் மற்றும் அரசு அலுவலர்கள் உட்பட பலர் கலந்து கொண்டனர்.